Тәуелсіздіктің 35 жылдығы: Егемен елдің қоғам белсендісі

Еңбек еленеді — ел өркендейді!

          Тәуелсіздік – кез келген ұлт үшін өлшеусіз құндылық, ғасырлар бойы аңсаған азаттықтың ақ таңы. Биыл еліміз егемендік тізгінін қолға алғанына      35 жыл толып отыр. Отыз бес жыл – тарих үшін қас-қағым сәт болғанымен, жас мемлекет үшін қалыптасудың, өсудің және кемелденудің тұтас бір дәуірі. Осы уақыт ішінде Қазақстан шиыршық атқан ширек ғасырдан аса уақытта әлем картасынан өз орнын мықтап ойып алған, экономикасы тұрақты, саясаты салмақты елге айналды.

          Еліміз жаңа дәуірге қадам басты. Осы кезеңде қоғам санасы өзгере түсті. Соның ішінде ең маңызды өзгеріс – белсенді азаматтық ұстанымның қалыптасуы. Бүгінгі таңда «қоғам белсендісі» деген ұғым жай ғана сөз емес, мемлекеттің дамуына тікелей әсер ететін нақты күшке айналды.

          Егемендік әрбір азаматқа еркіндік пен құқық беріп қана қоймай, үлкен жауапкершілік жүктейді. «Мемлекет маған не берді?» деп сұрайтын кезеңнен «Мен мемлекетке не бере аламын?» дейтін саналы кезеңге көштік.

Өмірімді өскелең ұрпақты тәрбиелеуге, білім мен кітапхана ісінің дамуына арнау – үлкен ерлік пен сарқылмас еңбекті талап ететін қасиетті жол. Білім саласы мен кітапхана ісіндегі 40 жылдан астам еңбек өтілім – жай ғана жылдар емес, бұл тұтас бір дәуірдің тынысы, өзгерістер мен ізденістерге толы өмір жолы. Заман талабына сай қағаз кітаптар мен электронды базаны ұштастыра отырып, жастардың оқуға деген қызығушылығын ояту – басты мақсатым болды. Кітапхананы жай ғана кітап сақтайтын орын емес, рухани орталыққа айналдыру жолында талай бастамалар жүзеге асырылды.

          Егемендік алғалы бері білім мен руханият саласында орасан зор өзгерістер орын алды. Тәуелсіздіктің 35 жылдық белесі – менің де атқарған еңбегімнің жемісін көретін шақ. Мемлекет тарапынан білім саласына, кітапханалардың материалдық-техникалық базасын жаңартуға көрсетіліп жатқан қолдау бұл саланың дамуына үлкен серпін берді.

          Еліміздің рухани қазынасын байытып, сан буынға бағыт-бағдар беріп келе жатқан сала ардагері ретінде, Тәуелсіздіктің 35 жылдығы қарсаңында мерейлі мерекеге орай ұйымдастырылған «Егемен елдің қоғам белсендісі» атты республикалық байқауда еңбегім елеусіз қалмай «Тәуелсіздік тарланы» төсбелгісі мен І дәрежелі Дипломмен марапатталдым. Осындай бағаға ие болу – мен үшін үлкен мәртебе. Бұл тек менің жеке жетістігім емес. Бұл – менімен бірге еңбек еткен әріптестерімнің, ұжымымның және мені қолдаған барлық оқырмандардың ортақ жеңісі.

          Ел Тәуелсіздігінің 35 жылдығы – бұл тек мерейтой ғана емес, бұл өткенге көз жүгіртіп, болашаққа айқын бағдар жасайтын маңызды кезең. Бүгінгі қоғам белсендісі ретінде менің басты мақсатым – жастарды отансүйгіштікке баулу, елдің дамуына үлес қосу және әділ де жасампаз қоғам құру жолындағы жұмыстарды жалғастыру. Ардагер ретіндегі басты парызым – жинаған тәжірибемді жас мамандарға үйретіп, оларды кітапқа, білімге деген адалдыққа баулу. Елдің ертеңі – білімді ұрпақтың қолында, ал сапалы білімнің қайнар көзі – кітап пен ұстаздың өсиетінде.

Әрбір азамат өз орнына адал еңбек етіп, елінің ертеңіне бей-жай қарамаса, біз бағындыратын асулар әлі алда.

          Тәуелсіздігіміз баянды, егемендігіміз тұғырлы болғай. Әрбір жасаған адал еңбегіміз ел игілігіне жарасып, тәуелсіз Қазақстанымыз күн санап өркендей берсін!

Ошакбаева Нургуль Крыкбаевна

«Каспий Қоғамдық университеті» колледжі БМ

кітапхана меңгерушісі

«Үздік кітапханашы» төсбелгісінің иегері